nepal life

अबुया ख्वाः स्वयेगु

डा. चुन्दा बज्राचार्य

गुंलागाः औसी अर्थात भाद्रकृष्ण कुन्हु नेवाः जातिया नापनापं मेमेगु जातिं नं थःत जन्म ब्यूम्ह अबुया दीर्घायु कामना यासें, अबुपाखें भिं जीवनया लागि सुवाः फयेगु दिं खः । भाद्रकृष्ण औसि कुन्ह अबुया ख्वाः स्वयेगु दिं खः ।

अबुया ख्वाः स्वयेगु औसियात कुशेऔशी धकाः नं धाः । छाय्धाःसा थ्वकुन्हु सराद यायेत माःगु पवित्रगु कुश गुरु पुरोहितपाखें पवित्रगु मन्त्रं साधना यानाः कुश लयाः दँछि यंक पुजा यायेत माःगु उगु कुश छेँय् छेँय् दुत हयेगु दिं जूगुलिं कुशेऔसी धकाः नं धःगु खः । विशेष यानाः गोकर्णऔसिकुन्हु थ्व गोकर्णया दोभानय् मेला जुइ । थ्व मेलाय् विशेष यानाः अबु मदुपिं जक वनी ।

बौद्धमार्गीपिनि स्वर्गे जुइ धकाः लय् लय्पतिं सराद याइगु तीर्थ मध्यय् दकले न्हापां थ्व तीर्थया् वनाः सराद यायेगु चलन दु । उकिं मृत्यु जूम्ह तरे यायेगुया लागि झिंनिगु तीर्थय् वनाः सराद यायेगु चलन दु । उकिं मृत्यु जूह तरे यायेगुया लागि झिंनिगय तीर्थय साराद याइगुलिइ थ्व गोकर्णया तीर्थय् नं सराद यायेमाः । बौद्धतय् झिंनिगू तीर्थ मध्यय् छगु तीर्थ कर्थ कयातः गु तीर्थय् छगू तीर्थ कथं कयातःगु तीर्थ खः । अबुया ख्वाः स्वयेकुन्हु अबु मदुपिसं थ्व तीर्थय् स्वत धाःसा थः अबुया ख्वाः हे खनी धयागु धाप दु । अबु मदये धुंकाः अबुया नामय् दँयदसं सराद यायेगुया लागि दकले न्हापां गोकर्णय् थ्व हे थासय् वनाः सराद यायेमाः । अले जक दँयदसं सराद याइबलय् मदुम्ह अबुयात वनी धकाः धायेगु चलन दु ।

गोकर्णया तीर्थय् ख्वाः खनीगु छपु बाखं हिमवत खण्डय् उल्लेख यानातःगु दु । छगु इलय् छम्ह व्यापार यानाः जीविका यानाः च्वंम्ह छम्ह मिसाया गर्भधारण जुल । गर्भधारण याःम्ह मिसा स्वय् गुम्ह मिजंया संसर्ग गर्भधारण जुल धयागु मस्यू । यक्व मिजंत नाप संसर्ग याइम्ह मिसा जूसां मातृत्वया भावना दयावयाः थःगु गर्भय् दुम्ह मचायात नं जन्म हे यात । वयागु नां दन्तुर धकाः नामाकरण यात । मचा तःधिकः जुसेँलिं थः मांयात थः अबु सु धकाः न्यन । स्वय्म मिसा मस्यू उकिं लिसः बी मफुत । अबु थाःगाः मदुम्ह दन्तुर तःधिकः जुसेलिं थःमांयात नं त्वःताः अबु माः वने धकाः मामां वन । थः अबु माले फुगुलिं पुलह धयाम्ह ऋषियाथाय् वनाः थःगु वेदना प्वंकल । पुलह ऋषिं गोर्कणेश्वर महाद्यःयात पूजा यानाः भक्तियात । नापनापं थः अबुया नामय् गोकर्णया तीर्थय् नसा तयेगु नं याना वयाच्वन । छन्हु थथे थः अबुया नामय् नयेगु नसा गोकर्णया तीर्थय् तये त्यंबलय् तीर्थय् आपलं मनूया ख्वाःपा खन । ख्वाःपाः फुकसिनं जि हे छिमि अबु खः धकाः धयाच्वन । धायेंयाम्ह थः अबु सु खः धकाः दन्तुर अलमल जुयाच्वंगु ध्यानय् च्वनाः च्वंम्ह विश्रवा ऋषिं खन । व हे थःगु साधनां सृष्टिकर्ता ब्रम्हायात दन्तुरया अबु म्हसिके ब्यू धकाः धासेंलि ब्रम्हा वयाः धात्थेंम्ह अबु थ्व धकाः म्हसीका बिल । ब्रम्हां क्यम्हेसित हे थः अबु धकाः म्हसिकाः कुश, हाम्बः लः तयाः पिण्ड तयाविल । थः अबु म्हसीकाः पिण्ड तःगु दिं धयागु भाद्रकृष्ण औसीकुन्हु अव मदूपिसं गोकर्णेश्वर महादेवयात पुजा यानाः पिण्ड तयाः गोकर्ण तीर्थया दोभानय् चुइका छ्वइगु खः ।

गाेकर्णय् श्राद्ध यानाच्वंपिं
गाेकर्णय् श्राद्ध यानाच्वंपिं

अबु मदुपिसं गोकेर्णेश्वर महादेवयात पूजा यानाः मदुम्ह अबुया नामय् गोकर्णेश्वर महादेवया प्रादुर्भाव गथे जुयाः जुल धयागु नं खँ न्ह्यथने माः थें च्वं । उकिं गोकर्णेश्वर महादेवया प्रादुर्भाव गथे जुयाः जुल धयागु खँ थथे खः ।

किरातकालय् मनूतय्गु जीवनचर्या गथे च्वं धकाः स्वयेत स्वर्गं महाद्यः मनूया रुप कयाः पशुपतिया श्लेषमान्तक जःखः छम्ह द्यःपाःलाःया भेषय् जइगु जुयाच्वन । लिपा अर्जुनं महाद्यःयात मामां वः बलय् श्लेषमान्तक वनय् मनूया रुपय् नाप लात । तर मनू रुपी महादेव थःहे महाद्यः धकाः मधाः । अर्जुनं किराती जुजुयात ब्वःब्यूगुलिं महाद्यः व अर्जुनया दथुइ ल्वापु जुल, ल्वापु जुजुं लिपा द्यः बी थें च्वंबलय् अर्जुनं थः महाद्यःया उपासनाय् च्वनाः ल्वापु दिका च्वंगुलिं महाद्यः निं पुजा याये धकाः पुजा याःबलय् याक्व महाद्यः रुपी मनूयात वन । थ्व खनाः अर्जुन थःनाप ल्वानाच्वंम्ह मनू हे महाद्यः धकाः सीकल । लिपा वहे महाद्यः किरातेश्वर महाद्यः धकाः जुयावन ।

अथें तुं स्वर्गय् च्वनाच्वंम्ह महाद्यः सुयातं मधाःसे पृथ्वीलोकय् वयाः गोकर्ण जंगलय् छपु जक न्यकू दुम्ह लुँया चल्लाया रुप कया जंगलया जनावरत नापनाप जुयाच्वन । स्वर्गय् महाद्यः मदुगुलिं पार्वति महाद्यः गन जुइ धकाः पृथ्वीइ वयाः हिमवत् खण्डया वागमति सिथय् महाद्यः गन जुइ धकाः तपस्या च्वन । स्वर्गय् महाद्यः पार्वती निम्हं मदुगुलिं देवगण फुकसिनं ब्रहा विष्णु व इन्द्रयात महाद्यः पार्वती माला हयेगु जिम्मा बिल । ब्रम्हा, विष्णु व इन्द्र स्वम्हं हिमवत खण्डय् वयाः महाद्यः पावर्तीयात माः वल । गोकर्णया वनय् चल्लातय्गु पुचलय् छपु जक न्यकू दुम्ह लुँयाम्ह चल्ला खंसेलि थ्व हे महाद्यःया रुप खः धकाः स्वम्हं जानाः लुँया चल्ला रुपी महाद्यःयात ज्वनेत स्वतः अमिगु ल्हातिइ न्यकू जक लात । न्यकू नं स्वकू टुक्रा जुयाः ब्रम्हायाके छकू, विष्णुयाके छकू व इन्द्रयाके छकू । चल्लारुपी महाद्यः अन्तरध्यान जुयाः आकाशवाणिं महादेवं स्वकू टुक्रा जूगु न्यकू छिपिं स्वम्हसिनं स्वर्गलोक पाताललोक व पृथ्वीलोकय् छथाय् छथाय् स्थापना यानाविल धाःसा थ्व स्वंगु लोकया रक्षा जुइ धकाः धाल । अनंलि तपस्या च्वनाच्वंम्ह पार्वतीयात थःगु दर्शन बियाः निम्हं स्वर्गय् वन ।

महादेव अथे धाःगुलिं विष्णु थःगु ल्हातिइ लाःगु न्यकूया छकू कुचा पातालय् तयाविल । इन्द्रया ल्हातय् लाःगु न्यकू स्वर्गय् तयाविल । ब्रम्हाया ल्हातय् लाःगु न्यकू चन्द्रभामा खुसि व वागमती खुसिया दोभान दुगु थाय्या सिथय् तया पृथ्वीइ च्वंपिन्त उदारया यायेत तयाविल । व हे थासं शिवलिङया उत्पति जुल । व हे शिवलिङयात गोकर्णेश्वर महादेव धकाः नामाकरण यात ।

लंकाया झिग्वः छ्यँ दुम्ह रावण जुजु हे नं गोकर्णय् वयाः स्वंगू लोकय् दकले शक्तिशाली व बल्लाःम्ह जुइमा धकाः महाद्यःया आराधना यानाः तच्वतं प्रसन्न जुयाः रावणयात शिवया ल्वाभः व दकले बल्लाःम्ह धकाः वरदान व्यूगु खः । व हे शक्तिं यानाः रावणया १० ग्वः छ्यं छक्वल मचायेकं सी मखुगु खः । 

गोकर्ण औंसिया बारे छपु बाखं धकाः भाजु पुण्यरत्न बज्राचार्यं थःगु सफु हाम्रो चाडपर्वय् थुकथं न्हयथनातःगु दु । प्राचिन इलय् पांचाल नांया छगू देशय बृषकर्ण नांया छम्ह जुजु दु । वया गोकर्ण नांया छम्ह काय् दु  । थुपिं अबुकाय् निम्हं छम्ह मेम्हनाप मिलय् मजू न्ह्याबले ल्वापु । निम्हसिनं निम्हेसित सीमा यमलोकय् लायेमा धकाः सराः बीगु जुयावन । धाथें छन्हु काय्म्ह गोकर्ण अबु स्वयां न्हापा सित । लिपा अबुम्ह नं सित । अवु स्वयां काय् न्हापा सीगु जूगुलिं सीम्ह अबुयात जलदान पिण्डदान यानाः काजक्रिया याइपिं सुं मदु । अबुया सरालं याना काय्म्ह न्हापा सीसा नं यमपुरी हे लानाच्वन । अबुम्ह सिनाः नं काजक्रिया याइपिं मदुगु जूगुलिं यमपुरीइ हे लात । छन्हु गोकर्णया यमपुरी चाः हिला च्वंबलय् अन छम्हसिया छ्यनय् चक्र चाः हिलाच्वंम्ह पापी खनाः ग्यानाः विस्युं वन । लिपा गोकर्ण गगनगञ्ज बोधिसत्वया आज्ञाकथं गोकर्णय् वनाः थः अबु बृषकर्णया नामं जलदान पिण्डदान आदि यानाः वल । गोर्कण थथे याःगुलिं अगति जुयाच्वंम्ह बृषकर्ण मुक्त जुयाः काय्या जय जुइमा धकाः आशिर्वाद बिल । अबुयागु थज्याःगु आशिर्वाद गोकर्ण नं नरकं मुक्त जुल । गोकर्ण गन अबुया नामं जलदान पिण्डदान याःगु खः, अन हे च्वनाः तपस्या यायां तरे जुल । वहे गोकर्णया नामं उगु थाय्या नां गोकर्ण जुल । अनंनिसे गोकर्ण तीर्थय् च्वनाः अबुया नामं जलदान पिण्डदान यात धाःसा मदुम्ह अबु तरे जुयाः स्वर्गवास जुइगु व वया सन्तानतय् भिं जुइगु जुल । थथे गोकर्ण अबुयात तरेयागु दिं भाद्रकृष्ण औसीया दिनय् लाःगु खः