nepal life

अफगानिस्तानय् सन् २०१७ स २० म्ह संचारकःमि स्यात

नेवा: अनलाइन न्युज | २०७४ पौष २८, शुक्रबार १७:३५:१९

अफगानिस्तानय् सन् २०१७ स कम्ती नं नीम्ह संचारकःमि स्याःगु बुखँय् जानकारी ब्यूगु दु ।

‘अफगान जर्नालिस्ट सेफ्टी कमिटी (एजेएससी) व इन्डिपेन्डेन्ट मिडिया सेफ्टी ग्रुप प्रोटेक्टिङ द रिपोर्टस राइट्सं’ शुक्रवाः थुगु विषयस जानकारी ब्यूगु खः ।

वंगु दँ सन् २०१७ स अफगानिस्तानय् पत्रकारपिन्त तच्वकं आक्रमण जूगु नं उगु बुखँय् जानकारी बियातःगु दु ।

पत्रकार हत्याय् विशेषयानाः अफगानिस्तानय् हिंसा न्ह्याकाच्वंपिं तालिवानतय्गु हे अप्वः ल्हाः दूगु नं बुखँय् जानारी बियातःगु दु ।

सन् २०१७ स २०१६ या तुलनाय् संचारकःमिपिन्त आक्रमण ६७ प्रतिशतं अप्वःगु एजेएससीं थःगु वेबसाइटय् तःु विज्ञप्तिइ जानकारी बियातःगु दु ।

एजेएससीया कथं सन् २०१७ स अफगानिस्तानया पत्रकारपिन्त हत्या, हिंसा, कुटपिट, ज्यान कायेगु धम्की व ख्वाच्वः थेंजाःगु १६९ गू घटना नं दर्ता जूगु खः ।

एजेएससीपाखें पिथंगु विज्ञप्ति कथं सन् २०१७ स तालिवान व इस्लामिस्ट स्टेट्स (आइएस) आतंककारीपुचलं याःगु आक्रमणय् लानाः नीम्ह संचारकःमिया ज्यान वंगु खः ।

अफगानिस्तानय् थुगु कथं जूगु पत्रकारपिनिगु हत्या हिंसाया घटनाप्रति अमेरिकां तसकं चिन्ता प्वंकूगु दु ।

अफगानिस्तानया पत्रकारिताया इतिहासय् सन् २०१७ इतिहासया हे दकले खतरनाक दँया रुपं जूगु नं सीदूगु बुखँय् जानकारी बियातःगु दु ।

एजेएससीया प्रमुख नाजिब सरिफं धयादीगु दु, “अफगानिस्तानय् पत्रकारपिन्त अप्वयाच्वंगु उगु हत्या हिंसाया हुनिं अनया प्रेस स्वतन्त्रता व पत्रकारपिनिगु सुरक्षायात हे तःधंगु न्ह्यसः चिं थंगु धयादीगु दु ।”

युद्धं आक्रान्त दयेकूगु अफगानिस्तानय् सन् २०१६ स जूगु थीथी आक्रमणतय्के १३ म्ह संचारकःमि स्याःगु खः । उकिया तुलनाय् वंगु दँ पत्रकारपिनिगु तःधंगु हिंसा जूगु खः ।

थुगु दँ अफगानिस्तानय् प्रेस स्वतन्त्रताया हनन्का नं आपालं घटनात जूगु सीदूगुलिं वइगु दिनय् पत्रकारिता पेशा व पेशाकःमिपिनिगु सुरक्षाया नितिं आपालं ज्या यायेमाःगु खनेदूगु अधिकारकःमिपिनिगु धापू खः ।

Categorized in अन्तर्राष्ट्रिय